Cystic fibrosis

لو قولت تعرف أي عن تليف الكبد هلاقي عدد كبير عنده خلفيه عن الموضوع حتي لو بسيطه و يعتبر مرض شائع الي حد ما، لكن لو قولت يعني اي "تليف كيسي" هسمع صوت صرصور الحقل، انا في البوست دا هقولك باختصار كل حاجه تخص مرض التليف الكيسي ف تابع للآخر عشان تستفيد.

-تعالي نفهم الأول يعني ايه تليف كيسي؟!.. هو عبارة عن مرض بيشخصوه علي انه اضطراب وراثي بيعمل ضرر شديد جدا للرئتين و الجهاز الهضمي و أعضاء تانيه في الجسم كمان، لما درسوا المرض بصورة اكبر لقو انه بياثر علي الخلايا اللي بتنتج المخاط و العرق و كمان العصارة الهضمي، "طب ايه نتيجة انه هياثر علي الخلايا دي؟" قالك ان السوائل المفرزة اللي ذكرتها فوق دي بتكون رقيقه و زلقه الا لو حصلت أصابه بالتليف الكيسي دا بيخليها لزجه و سميكه و بدل ما كانت مواد بتبطن و تغلف الأعضاء هتبقي مواد بتسد الانابيب و القنوات و الممرات و خصوصا في البنكرياس و الرئتين.

-و برغم ان التليف الكيسي مرض بيتقدم بسرعه و بيحتاج رعايه يوميه الا ان الأشخاص المصابين بيمارسوا حياتهم بصورة طبيعيه، و بفضل تطور الطب دلوقت و جدوا ان الأشخاص المصابين حاليا حياتهم احسن من المصابين زمان و فيه تحسن في التشخيص و العلاج بيقول انهم يقدروا يعيشوا لمنتصف سن ال 30 و ال 40، كمان فيه منهم يقدر يعيش لسن ال 50. حاليا في الولايات المتحدة فيه فحص للأطفال حديثي الولاده بيشخصوا من خلاله التليف الكيسي خلال الشهر الأول و قبل ظهور اي اعراض.

-و طبعا زي اي مرض تاني التليف الكيسي ليه اعراض وعلامات تختلف حسب شدة المرض و ممكن تزيد او تتحسن بمرور الوقت، ممكن متظهرش علي المصاب اي أعراض لحد سن البلوغ و دي مش حاجه مطمئنه دائما لان اوقات بيكونوا اكثر عرضه للنوبات المتكررة من التهاب البنكرياس و العقم و الالتهاب الرئوي المتكرر، تعرف ان الأشخاص المصابين بيكون مستوي الملح في العرق عندهم عالي جدااا لدرجه ان ممكن لو اب بيقبل طفله هيحس بطعم الملح!!.

-و بما ان معظم اعراض التليف الكيسي بتظهر علي الجهاز التنفسي و الهضمي، تعالي اقولك ع الأعراض دي واحده واحده... ~بالنسبه للجهاز التنفسي؛ قولنا في الأول أن المخاط بسبب المرض دا بيكون سميك ولزج و بالتالي هيسد الانابيب اللي بتحمل الهوا داخل و خارج الرئتين و دا هيخلي اعراض كتير تظهر زي : سعال مستمر معاه بلغم، المصاب بيكون عصبي، التهابات متكررة في الرئه، التهاب الممرات الانفيه و انسداد الأنف، واخيرا التهاب الجيوب الأنفية المتكرر.

-اما بالنسبة للجهاز الهضمي فالمخاط السميك هيسد الانابيب اللي بتنقل انزيمات الهضم من البنكرياس للامعاء الدقيقه و بكدا الامعاء مش هتقدر تمتص العناصر الغذائية في الطعام و دا هيؤدي الي: براز دهني كريه الرائحه، ضعف زياده الوزن و قلة النمو، انسداد معوي خصوصا عند الأطفال حديثي الولاده، امساك شديد او مزمن.

-فاكرين لما قولنا ف الاول انه اضطراب وراثي؟ ، تعالي نكمل المعلومه و نقول ان الأطفال بيحتاجوا وراثة نسخه من الجين من كل والد(الجين اللي حصل فيه عيب و ادي لمرض التليف الكيسي) عشان يصابوا بالمرض،ولو ورثوا نسخه واحده فقط من احد الأبوين مش هيتصابوا بالمرض و لكن هيكونوا حاملين للجين و ممكن ينقلوه لاطفالهم.

~كدا الجزء الأول من موضوعنا خلص، استنوا الجزء التاني قريب جدا، سلام.