Scroll For English.
هتتصرف ازاي لو شفت حد بيعمل حركات غريبة بجسمه كأنه بيرقص و يبتكلم بطريقة غير عادية؟! هل هتتعامل معاه بطريقة طبيعية ولا هتتنمر و تتريق عليه حتى لو من وراه؟عزيزي القارئ، المخ البشري بيخزن أنماط الحركة اللي اتعلمناها فمثلًا لو أنت في حالة سكون، فالأنماط ده ببساطة هتكون مش شغالة، و الإنسان بيقدر يتحكم في حركاته عن طريق إنه يقوم بتنشيط الأنماط ده بكل ببساطة مجرد ما ينوي يعمل كدة.
هتقولي: طيب حلو أوي ده شئ عظيم فين المشكلة؟، المشكلة يا عزيزي القارئ إنه لو المخ البشري فشل في التحكم في الأنماط ده ايه اللي مكن يحصل؟!
موضوع النهاردة هيكون عن مرض جيني، بيتسبب في الانهيار التدريجي (التنكس) للخلايا العصبية في الدماغ، مرض فتاك بكل معني الكلمة، هنتكلم النهاردة عن مرض هنتنغتون اللي بيتسبب في توقف عمل أجزاء من الدماغ بشكل صحيح و الأمر بيسوء بمرور الوقت و بعد 20 سنة بيوصل لذروة شراسته و في المراحل المتأخرة لازم يتوافر رعاية تمريضية بدوام كامل!
أعراض ظهوره بتبدأ من سن 30 إلى 50 سنة، لكن ممكن تظهر قبل كدة كمان، طب ايه هي الأعراض؟ صعوبة في التركيز و هفوات الذاكرة. الاكتئاب. خلل في المشي ووضعية الجسم والتوازن. حركات اهتزازية أو متلوية لاإرادية (رقص). تغيرات في المزاج و تغييرات في الشخصية. مشاكل في البلع و التحدث و التنفس.
مرض هنتنغتون هو مرض وراثي وممكن يصيب المرأة والرجل على حد سواء، هل ممكن شخص يكتشف إنه مصاب و مفيش تاريخ مرضي في عيلته؟ الإجابة أه ، لكن ده عادة بسبب إن محدش قبل كدة اتشخص بإنه حامل للمرض ده!
عمومًا ده نتيجة لخلل جيني بيدمر أجزاء في الدماغ، و عادة هتكون في خطر الإصابة لو واحد من الأب أو الأم عنده أو بالفعل كان عنده مرض هنتنغتون.
لو حد من الأب أو الأم عنده جين مرض هنتنغتون، ففيه احتمالين:
1- فيه احتماية 50% إنه الأطفال يعانوا منه و كمان ينقلوه لأحفادهم. 2-فيه احتماية 50% إنه الأطفال ميعانوش من المرض و لا يتنقل للأحفاد.
إيه الإجراءات اللي لازم تتبع لو أنت في عيلتك حد عنده مرض هنتنغتون خاصة لو بتخطط لحدوث حمل؟ لازم تزور متخصص و و هيقوم باختبارات عشان يحدد حالتك.
نيجي لجزئية مهمة و أكيد الكل بيسأل دلوقتي عنها هل مرض هنتنغتون ليه علاج؟ للأسف مفيش علاج حاليا لمرض هنتنغتون أو أي حاجة تمنعه من إنه يطور للأسوء، لكن على الأقل فيه علاج للمشاكل اللي بيسببها زي:
- أدوية للاكتئاب ،و التقلبات المزاجية، و الحركات اللإرادية اللي بيعاني منها المريض. - علاج وظيفي بحيث يساعدهم في الأنشطة اليومية اللي بيعملوها. - علاج التخاطب عشان التواصل و التغذية. - علاج طيبعي بحيث يساعدهم في الحركة و التوازن.
و بس كدة عزيزي القارئ أتمنى في المرة القادمة لما تشوف حد عنده اضطراب عقلي متتعاملش معاه بشكل مهين، و برده مينفعش تتريق عليه حتى لو من وراه.
Comentarios