Vitiligo

تعالى نبعد من هنا. ليه؟ إنت مش شايف الولد اللي كان جمبنا عنده بهاق و ممكن يعدينا؟ اممممم لكن البهاق مش معدي خالص. إزاي يعني؟ عزيزي القارئ هنتكلم النهاردة عن مرض البهاق، و إزاي إن مريض البهاق بيعاني نفسيًا أكتر من أي أعراض عضوية، و إن فيه خرافات حول هذا المرض و المجتمع مصدقها. غالبًا عزيزي القارئ شفت شخص ما و كان لون جلده مش موحد زي ميكون الجلد فقد لونه، و ده بيكون عرض أساسي لمرض البهاق. البقع اللي بيسببها المرض بتزيد مع الوقت، و بتنتشر في أي جزء من الجسم، البهاق بيكون واضح في الناس اللي بشرتها غامقة. لكن الأصعب من ده كله إن الشخص المصاب بيبدأ يفقد الثقة بنفسه، و بيتحمل السخرية من كتير، و يكون في علمك عزيزي القارئ، إن في الحالة ده مريض البهاق معرض للإصابة بالاكتئاب، و السبب ممكن يكون إنت و المجتمع! أعراض البهاق بتضمن: • الجلد بيفقد لونه على شكل بقع، في الأول على الإيدين و الوجه، و المناطق اللي بتبقى محيطة بفتحات الجسم و الأعضاء التناسلية. • الرموش و الحواجب و الشعر بيدأ يتغير لونهم للأبيض أو الرمادي بشكل مبكر. • الأنسجة اللي داخل الفم و الأنف لونها كمان بيتغير. تخيل إنه غالبًأ مرض البهاق بيظهر قبل عمر ال30! مريض البهاق بيكون معرض للاضراب النفسي و الاجتماعي، حروق الشمس‘ فقدان السمع، و مشاكل في البصر. فكرت قبل كدة ايه اللي بيدي اللون لجسمك؟ خلايا الميلانين أو الخلايا المنتجة للصبغات، و لما الخلايا ده بتموت أو بتتوقف عن عملها الشخص بيصاب بالبهاق، و السبب غير معروف تحديدًا، لكن ممكن يكون مرتبط بالتاريخ الوراثي أو الجهاز المناعي. العلاج: العلاج بيعتمد على عمرك، و مدى انتشار البهاق ، و سرعة انتشاره، و ازاي بيأثر على حياتك، في البداية ممكن يقترح الطبيبب أدوية لتسمير البشرة أو استخدام المستحضرات التجميلية، و العلاج ممكن يكون مجرد أدوية، و ممكن استخدام الأشعة فوق البنفسجية ضيقة النطاق، أو التدخل الجراحي. و اللي ممكن ميخطرش على بالك إن الطبيب من الممكن إنه يقترح طبيب نفسي لمريض البهاق لو تطلب الأمر! نجاح العلاج مش مؤشر إن مش هيظهر بقع جديدة تاني، و يحصل انتكاسة. في النهاية حابين نأكد إنه مادام أي إنسان مصاب بأي مرض و مش هيسبب لغيره الأذى، فلازم نتقبله، و نتقبل اختلافه، و نتعامل معاه كأى إنسان عادي. و دمتم سالمين.